ОПШТИНАТА И ЈАВНИТЕ ПРЕТПРИЈАТИЈА ЈА ЗАПОЧНАА АКЦИЈАТА ЗА ЧИСТЕЊЕ НА ДИВИТЕ ДЕПОНИИ ВО БИТОЛА

Од утрово, започна акцијата за чистење на дивите депонии во Битола. Еден од приоритетите на локалната самоуправа во соработка со јавните претпријатија е компленто да се промени лошата слика која во моментот ја има на повеќе места низ општината. После спроведеното мапирање на најкритичните точки каде се создадени најголемите депонии, со денешната акција се чистат три локации: Обиколницата над Битола, на потегот од Лукоил до тунелот, патот кон село Бистрица и просторот кај ОУ Коле Канински.

Градоначалникот, надлежните служби од општинската администрација и директорите на јавните претпријатија ги посетија локациите каде се спроведува денешната акција, со цел понатамошно координирано делување и на другите места каде е неопходно расчистување.

Акцијата продолжува и во следниот период, а граѓаните имаат можност дополнително да пријавуваат диви депонии преку веб платформата „Пријави проблем“ или на електронската адреса contact@bitola.gov.mk.

Со ваквиот пристап, локалната самоуправа во соработка со граѓаните, ќе овозможи навремено расчистување и спречување на појавата на нови депонии кои имаат негативно влијание и врз животната средина.